ସ୍ୱର୍ଗତଃ ଅଟଳ ବିହାରୀ ବାଜପେୟୀ ଜନଜାତିଙ୍କ ବିକାଶ ପାଇଁ ତଥା ଆଦିବାସୀଙ୍କ କଳା, ସଂସ୍କୃତିକୁ ଉଜ୍ଜୀବିତ କରିବା ଉଦେ୍ଦଶ୍ୟରେ “ଜନଜାତି ମନ୍ତ୍ରଣାଳୟ” ଗଠନ କରିଥିଲେ। ଅଟଳ ବିହାରୀ ବାଜପେୟୀ ଜନଜାତିଙ୍କ ବିକାଶ କଥା ଚିନ୍ତା କରି ଓଡ଼ିଶାର ଜଣେ ଆଦିବାସୀ ନେତା ଜୁଏଲ ଓରାମଙ୍କୁ ପ୍ରଥମରୁ ଜନଜାତି ବିକାଶ ମନ୍ତ୍ରଣାଳୟର ଦାୟିତ୍ୱ ପ୍ରଦାନ କରିଥିଲେ। ପରବର୍ତ୍ତୀ ସମୟରେ ମୋଦିଙ୍କ ସରକାରରେ ମଧ୍ୟ ଶ୍ରୀ ଜୁଏଲ ଓରାମ ଏହି ମନ୍ତ୍ରଣାଳୟର ଦାୟିତ୍ୱ ଗ୍ରହଣ କରିଥିଲେ। ଏହା ସମସ୍ତ ଆଦିବାସୀ ସମାଜ ପାଇଁ ଗର୍ବ ଓ ଗୌରବର ବିଷୟ। ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଜୀ ଓଡ଼ିଶାର ଜଣେ ଆଦିବାସୀ ମହିଳା ଦୌପଦୀ ମୁର୍ମୁଙ୍କୁ ସମ୍ବିଧାନର ସର୍ବୋଚ୍ଚ ସ୍ଥାନରେ ଦେଇ ରାଷ୍ଟ୍ରପତି କରାଇଛନ୍ତି। ସେତିକି ନୁହେଁ ବିର୍ସା ମୁଣ୍ଡାଙ୍କ ଜନ୍ମଦିବସ ୧୫ ନଭେମ୍ବରକୁ ଜନଜାତୀୟ ଗୌରବ ଦିବସ ରୂପେ ୨୦୨୧ ମସିହାଠାରୁ ପାଳନ କରାଯାଉଛି। କିନ୍ତୁ ବିଜେଡି ସରକାର ଦୀର୍ଘ ୨୫ ବର୍ଷ ଶାସନରେ ରହିବି ଜନଜାତି ଓ ଆଦିବାସୀମାନଙ୍କ ପାଇଁ କିଛି କରିନାହାନ୍ତି ବୋଲି ସାଂସଦ ଶ୍ରୀ ଜୁଏଲ ଓରାମ କହିଛନ୍ତି। ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସାଂସଦ ଶ୍ରୀ ଓରାମ କହିଛନ୍ତି ଯେ, ବିଜେଡି ସରକାରର ଆଦିବାସୀ ବିରୋଧୀ ମାନସିକତା ସେତେବେଳେ ସ୍ପଷ୍ଟ ହେଲା ଯେତେବେଳେ ଜନଜାତି ଉପଦେଷ୍ଟା ପରିଷଦ(ଟିଏସି)ର ଦ୍ୱାହି ଦେଇ ଆଦିବାସୀଙ୍କ ଜମିକୁ ଶିଳ୍ପପତି ଓ ପୁଞ୍ଜୀପତିଙ୍କୁ ଟେକି ଦେବା ପାଇଁ କ୍ୟାବିନେଟ୍ ନିଷ୍ପତି ନେବାର ଘୋଷଣା କଲେ। ୨୫ ବର୍ଷର ବିଜେଡି ସରକାର ଥରେ ମଧ୍ୟ ଆଦିବାସୀଙ୍କ ପ୍ରତି ଆଦୌ ସମ୍ବେଦନା ପ୍ରକାଶ କରିନାହାନ୍ତି ବରଂ ଜମି ହଡ଼ପ କରିବା ଭଳି ଚକ୍ରାନ୍ତ କରିଛନ୍ତି। ଏପରି ସରକାରଙ୍କ କାର୍ଯ୍ୟକଳାପକୁ ଘୋର ନିନ୍ଦା କରିବା ସହିତ ଓଡ଼ିଶାବାସୀଙ୍କ ପାଖରେ ବିଜେପି, ଆଦିବାସୀ ଓ ବିକାଶ ବିରୋଧୀ ସରକାରକୁ ଚଳିତ ନିର୍ବାଚନରେ ଭୋଟ ନଦେଇ ଉଚ୍ଚିତ ଜବାବ ଦେବାକୁ ନିବେଦନ କରୁଛି। ଟ୍ରାଇବାଲ ଆଡଭାଇଜରି କମିଟିର ଚେୟାରମ୍ୟାନ ହେଉଛନ୍ତି ମୁଖ୍ୟମନ୍ତ୍ରୀ। ପ୍ରତି ବର୍ଷ ୨ ଥର କମିଟି ବସିବା କଥା। କିନ୍ତୁ ନବୀନ ବାବୁ ୨୫ ବର୍ଷ ଶାସନ କାଳରେ ମାତ୍ର ୨ ଥର କମିଟିର ମିଟିଂ କରିଛନ୍ତି। ଏଥିରୁ ସ୍ପଷ୍ଟ ଯେ, ରାଜ୍ୟ ସରକାର ଜନଜାତିଙ୍କ ପ୍ରତି କେତେ ଦରଦ? ଏସିଏସ୍ଟି ଫାଇନାସ୍ କର୍ପୋରେସନରୁ ଅଳ୍ପ ସୁଧରେ ଟଙ୍କା ନେଇ ଆଦିବାସୀମମାନେ ଲାଭାନ୍ୱିତ ହେବା କଥା। କିନ୍ତୁ ପରିତାପର ବିଷୟ ଯେ, ଏହି ବ୍ୟବସ୍ଥାକୁ ନବୀନ ବାବୁ ବନ୍ଦ କରି ଦେଇଛନ୍ତି। ସେହିଭଳି ଟ୍ରାଇବାଲ ଡେଭଲପମେଂଟ କର୍ପୋରେଟିଭ୍ କର୍ପୋରେସନ( ଟିଡିସିସି) ମହୁଲ, ଚାର, ଶାଳମଞ୍ଜି ସଂଗ୍ରହ କରିବା କଥା, ତାହା କିନ୍ତୁ କାର୍ଯ୍ୟକାରୀ ହେଉନାହିଁ। ପ୍ରତି ପଂଚାୟତରେ ଏକଲବ୍ୟ ମଡେଲ ସ୍କୁଲ କରିବା ପାଇଁ ମୋଦି ସରକାର ପ୍ରତ୍ୟେକ ପଂଚାୟତ ସମିତି ପାଇଁ ୨୫ କୋଟି ଟଙ୍କା ଦେଇଛନ୍ତି। ଦୁର୍ଭାଗ୍ୟର ବିଷୟ ରାଜ୍ୟ ସରକାର ଏଥିପାଇଁ ଜମି ଦେଉନାହାନ୍ତି। ଡିଏଲଆର ଓ ଏମଏଲଆର ବିଭିନ୍ନ ଜାଗାରେ ସ୍ଥାୟୀ ହୋଇଛି କିନ୍ତୁ ଏସ୍ଟି କୋଟା ପୂରଣ କରିନାହାନ୍ତି। ଏସ୍ଟି ଓ ଏସ୍ସି କୋଟାକୁ ପୂରଣ କରିବା ପାଇଁ ବ୍ୟବସ୍ଥା କରିବା କଥା, ତାହା ମଧ୍ୟ ରାଜ୍ୟ ସରକାର କରିନାହାନ୍ତି ବୋଲି ଶ୍ରୀ ଜୁଏଲ ଓରାମ କହିଛନ୍ତି। ମୋଦି ସରକାର ଏସ୍ଟି, ଏସ୍ପି ମାନଙ୍କ ଷ୍ଟାଇପେଣ୍ଡ ମଧ୍ୟ ବଢ଼ାଇଛନ୍ତି, ସର୍ବାଧିକ ସ୍ଥାନରେ ଓଡ଼ିଶାର ଆଦିବାସୀମାନଙ୍କୁ ଉଚ୍ଚ ପଦପଦବୀରେ ରଖିଛନ୍ତି। ଆଦିବାସୀ ଭାଷାର ଶିକ୍ଷାଦାନ କେନ୍ଦ୍ର ସରକାରଙ୍କ ପ୍ରଚେଷ୍ଟାରେ ଓଡ଼ିଶାର କୁଇ, ଦେଶିଆ, ଗଦବା, ଜୁଆଙ୍ଗ, କିସାନ, ସାନ୍ତାଳୀ ଓ ସଉରୀ ଭାଷାରେ ବର୍ଣ୍ଣବୋଧ ତିଆରି କରି ଶିକ୍ଷାଦାନ କରାଯାଉଛି। ଆଦିବାସୀ ଭାଷାରେ ଶିକ୍ଷାଦାନ ପାଇଁ ଶିକ୍ଷକ ଓ ଛାତ୍ରମାନଙ୍କ ପାଇଁ ପାଠ୍ୟ ସାମଗ୍ରୀ ବିକଶିତ କରାଯାଇଛି। ଓଡ଼ିଶାର ଆଦିବାସୀମାନଙ୍କୁ ରାଜ୍ୟ ସରକାର ଲଘୁ ବନଜାତ ଦ୍ରବ୍ୟର ଉଚିତ ମୂଲ୍ୟ ଦେଉନାହାନ୍ତି। କିନ୍ତୁ ମୋଦି ସହାୟତା ମୂଲ୍ୟ ୫୦ କୋଟି ଟଙ୍କା ଦେଇଛନ୍ତି, ୮ କୋଟିରୁ ଅଧିକ ଟଙ୍କା ଅନୁଦାନ ମଧ୍ୟ ଦିଆଯାଇଛି। ଅତ୍ୟନ୍ତ ପରିତାପର ବିଷୟ କେନ୍ଦ୍ର ସରକାର ଆଦିବାସୀଙ୍କ ବିକାଶ ପାଇଁ ବହୁ ଯୋଜନା ଓ ଆର୍ଥôକ ଅନୁଦାନ ଦେଉଥିବାବେଳେ ରାଜ୍ୟ ସରକାର ଏହାକୁ ଲୁଟ୍ କରୁଛି ବୋଲି ଶ୍ରୀ ଓରାମ କହିଛନ୍ତି। ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖପାତ୍ର ତଥା ପୂର୍ବତନ ସାଂସଦ ଶ୍ରୀ ବଳଭଦ୍ର ମାଝୀ, ବିଧାୟକ ଭବାନୀ ଭୋଇ, ବିଧାୟିକା କୁସୁମ ଟେଟେ, ରାଜ୍ୟ ସାଧାରଣ ସଂପାଦିକା ପୂର୍ଣ୍ଣିମା କେରକେଟା ପ୍ରମୁଖ ଉପସ୍ଥିତ ଥିଲେ।
