ଆସ ବିକ୍ରି ହେବା!

ଆସ ବିକ୍ରି ହେବା!

ପ୍ରକାଶ ରଥ ପୌରାଣିକ ଚରିତ୍ର ଦାନବୀର ହରିଶ୍ଚନ୍ଦ୍ର ନିଜର ସତ୍ୟ ରକ୍ଷା ପାଇଁ, ମଶାଣି ଜଗୁଆଳୀ ଚଣ୍ଡାଳ ପାଖରେ ନିଜକୁ ବିକ୍ରି କରିଦେଇଥିଲେ। ବିଶ୍ୱର ସର୍ବବୃହତ୍ ଗଣତାନ୍ତ୍ରିକ ରାଷ୍ଟ୍ର ଆମେରିକାରେ ପୂର୍ବରୁ ନିଗ୍ରୋମାନଙ୍କୁ ବିକ୍ରି କରିଦିଆଯାଉଥିଲା କ୍ରୀତଦାସ ଭାବରେ। ବ୍ରିଟିଶ ସାମ୍ରାଜ୍ୟର ଉପନିବେଶବାଦ ନୀତିରେ ସାଧାରଣ ଗରିବ ଲୋକମାନେ ବିକ୍ରି ହେଉଥିଲେ ପଣ୍ୟଦ୍ରବ୍ୟ ପରି। ଗୋତି ଶ୍ରମିକ ପ୍ରଥା ଏବେ ବି ଭାରତବର୍ଷରେ କେଉଁଠି ନା କେଉଁଠି ଲୁଚି ରହିଛି ଅତ୍ୟନ୍ତ ସୂକ୍ଷ୍ମ ଭାବରେ। ଜଙ୍ଗଲରେ ସ୍ୱାଧୀନ ଭାବେ ଘୂରି ବୁଲୁଥିବା ପଶୁପକ୍ଷୀଙ୍କୁ ଆମେ ଈଶ୍ୱରଙ୍କ ସର୍ବଶ୍ରେଷ୍ଠ ସୃଷ୍ଟି ମଣିଷ ଜାତି, ଧରି ନେଇ ବାନ୍ଧି କରି ରଖୁଛେ ନଚେତ୍ ଖାଦ୍ୟ ପାଇଁ ବିକ୍ରି କରୁଛେ। ବିଭିନ୍ନ ରକମର ବେପାରୀମାନେ ବିଭିନ୍ନ କିସମର ନିର୍ଜୀବ ଓ ସଜୀବ ବସ୍ତୁ ତଥା ସାମଗ୍ରୀ ବିକ୍ରିବଟା କରୁଛନ୍ତି। ବିକ୍ରିବଟା ଫଳରେ ଆର୍ଥିକ ରୋଜଗାର ବଢିଥାଏ ବେପାରୀମାନଙ୍କର। ନିର୍ଜୀବ ପଦାର୍ଥ ସବୁ ବିକ୍ରିବଟା ହୋଇଥାନ୍ତି ବିନା ବିରୋଧରେ। କାରଣ ସେମାନେ ନିର୍ଜୀବ! କିନ୍ତୁ ସଜୀବ ଯଥା ପଶୁପକ୍ଷୀ, କୀଟପତଙ୍ଗ ନିଜ ବିକ୍ରିକୁ ବିରୋଧ କରୁଥିଲେ ମଧ୍ୟ ମଣିଷ ଆଗରେ ସେମାନଙ୍କ ବଳ ପାଏନାହିଁ। ବାଧ୍ୟ ହୋଇ ବ୍ରିକି ହୋଇଥାନ୍ତି ମଣିଷର ମନୋରଞ୍ଜନ ନିମନ୍ତେ ନଚେତ୍ ଖାଦ୍ୟ ଭାବେ ପ୍ରସ୍ତୁତ ହେବା ପାଇଁ। ଏବେ କିନ୍ତୁ ସମଗ୍ର ବିଶ୍ୱରେ ମଣିଷ ବି ବିକ୍ରି ହେଲାଣି। ଆମ ଦେଶରେ ତ ଏହା ଆହୁରି ସଙ୍ଗୀନ ଅବସ୍ଥା ଧାରଣ କରିଛି। ଆମ ଶିକ୍ଷିତ ଯୁବକ ସୁଖ ସ୍ୱାଚ୍ଛନ୍ଦ୍ୟ ତଥା ଅର୍ଥ ପାଇଁ ବିଦେଶରେ ବିକ୍ରି ହେଉଛି ତ ଆମ ଗରିବ ଝିଅମାନେ ନିଜ ପେଟ ପୋଷିବା ପାଇଁ ନିଜକୁ ବିକ୍ରି କରୁଛନ୍ତି ସବୁଦିନ। ଆମ ଗରିବ ଯୁବଗୋଷ୍ଠୀ ନିଜ ପରିବାର ଚଳାଇବା ପାଇଁ ପଡ଼ୋଶୀ ରାଜ୍ୟକୁ ଦାଦନ ଖଟିବାକୁ ଯାଇ ନିଜକୁ ସେଠାରେ ଦଲାଲ ଓ ସାହୁକାରଙ୍କ ପାଖରେ ବିକ୍ରି କରିଦେଉଛି। ଆଜିର ଶିକ୍ଷକ ନିଜର ଶିକ୍ଷକତାକୁ, ଡାକ୍ତର ତାର ସେବାକୁ, ସରକାରୀ ଚାକିରୀଆ ତା’ର କର୍ତ୍ତବ୍ୟ ପରାୟଣତାକୁ, ସମାଜସେବୀ ତାର ସେବାକୁ, ଇଞ୍ଜିନିୟରମାନେ ତାଙ୍କ ବୃତ୍ତିକୁ, ସାମ୍ୱାଦିକ ତାର ସାମ୍ୱାଦିକତାକୁ, ବୁଦ୍ଧିଜୀବୀ ତାଙ୍କର ବୁଦ୍ଧିକୁ, କଳାକାର ତା’ର କଳାକୁ, କବି ଓ ସାହିତ୍ୟିକ ସତ୍ୟକୁ ବିକି ସାରିଛନ୍ତି ବିଭିନ୍ନ ବାଧ୍ୟବାଧକତା ତଥା ନିଜର ସ୍ୱାର୍ଥ ପାଇଁ। ଦେଶର ଯୁବଗୋଷ୍ଠୀ ମଧ୍ୟ ନିଜର ଯୁବସୁଲଭତାକୁ ବିକି ସାରିଲେଣି। ଦେଶକୁ ଚଳାଉଛନ୍ତି ବୋଲି ଦାବି କରୁଥିବା ଆଜିକାଲିର ରାଜନେତାମାନେ ନିଜର ବିବେକ, ବୁଦ୍ଧିକୁ ଅର୍ଥ ଓ କ୍ଷମତା ଆଗରେ ବିକ୍ରି କରିସାରିଛନ୍ତି। ବରଂ କ୍ଷମତା ପାଇଁ ଏହି ରାଜନେତାମାନେ ଏବେ ମଣିଷରୂପୀ ଭୋଟରମାନଙ୍କୁ କିଣିବାରେ କେବଳ ବ୍ୟସ୍ତ ରହୁଛନ୍ତି। ଗାଁ ଗାଁ ବୁଲି ଛେଳି, ମେଣ୍ଢା, କୁକୁଡ଼ା, ଗାଈଗୋରୁ କିଣୁଥିବା ହଡ଼ାବେପାରୀମାନେ ସେମାନଙ୍କ ପରିବାର ପ୍ରତିପୋଷଣ ପାଇଁ ଏହି କିଣାବିକା କରୁଥିବା ବେଳେ ଆସ୍ତେ ଆସ୍ତେ ଏହିସବୁ ପଶୁମାନଙ୍କ ସଂଖ୍ୟା କମିବାରେ ଲାଗିଛି। କିନ୍ତୁ ଆମେ ଜୀବଜଗତର ସର୍ବଶ୍ରେଷ୍ଠ କୃତ୍ତି ବୋଲି ଦାବି କରୁଥିବା ମଣିଷ ଜାତି ସଂଖ୍ୟାରେ କମୁନାହେଁ ସିନା କିନ୍ତୁ ଆମ ମଣିଷତ୍ୱକୁ ବିକି ଆମେ ଏହି ଇତର ପଶୁପକ୍ଷୀଙ୍କଠୁ ନିଜକୁ ଅତି ନିକୃଷ୍ଟ ଦର୍ଶାଉଛେ। ଏବେ ଆମ ଦେଶରେ ଗଣତନ୍ତ୍ରର ମହାପର୍ବ ସାଧାରଣ ନିର୍ବାଚନକୁ ଆମେ ସାମନା କରୁଛେ। ଆମ ରାଜ୍ୟ ଆମ ଦେଶକୁ କିଏ ଭଲରେ ଚଳାଇବ, କିଏ ସୀମାକୁ ସୁରକ୍ଷା ଦେବ, କିଏ ବିକାଶର ରାସ୍ତା ତିଆରି କରିବ, କିଏ ଶିକ୍ଷା, ସ୍ୱାସ୍ଥ୍ୟ, ବେକାରୀ ସମସ୍ୟାକୁ ଦୂରେଇବ, ଆଇନ୍ ଶୃଙ୍ଖଳା ବଜାୟ ରଖିବ, ମହିଳା ଓ ଶିଶୁ ସୁରକ୍ଷାକୁ ଗୁରୁତ୍ୱ ଦେବ, କିଏ ପାନୀୟ ଜଳ ଓ ବିଦ୍ୟୁତ୍ ବ୍ୟବସ୍ଥାକୁ ସଜାଡ଼ିବ, କିଏ ରୋଜଗାର ବଢାଇବ, କିଏ ଦୁର୍ନୀତି ଓ ଭ୍ରଷ୍ଟାଚାରକୁ ବନ୍ଦ କରିବ ତାହାକୁ ଦେଖି ଆମ ପ୍ରତିନିଧି ବାଛିବା ଜରୁରୀ ହୋଇପଡ଼ିଛି। କିନ୍ତୁ ଆମେ ନାଗରିକମାନେ ଯେଉଁମାନେ ପ୍ରତିଦିନ ବିକ୍ରି ହେଉଛେ ଆମେ ପୁଣି ନିର୍ବାଚନରେ ପ୍ରାର୍ଥୀ ଦେଖି ଭୋଟ ଦେବା! ବିଭିନ୍ନ ମାଗଣା ଖାଇବା ଯୋଜନା ଓ ମାଗଣା ପାଇବା ଯୋଜନାରେ କିପରି ନାମ ଲେଖାଇବା ସେଥିପାଇଁ ଆମେ ପରସ୍ପର ଭିତରେ ପ୍ରତିଯୋଗିତା କରୁଛେ। ନେତାମାନେ ବି ଏହାର ଫାଇଦା ନେଇ ଆମକୁ ସବୁ ଯୋଜନାରେ ପୁରେଇ ଦେବେ ବୋଲି କହି ଆମକୁ ଭୂଆଁ ବୁଲଉଛନ୍ତି। ଏହି ଯୋଜନାମାନ ଛାଡ଼ି ବିଭିନ୍ନ ଲାଭଜନକ ବେପାରର ଲାଇସେନ୍ସ କରାଇଦେବା, ଠିକାଦାରୀ କରିବା, ବାଲିଘାଟ, ମଦଦୋକାନ କରାଇଦେବା, ସ୍ୱୟଂ ସହାୟକ ଗୋଷ୍ଠୀ ମାଧ୍ୟମରେ ଲୋନ୍ କରାଇଦେବା, ଗାଁ ସହର ସବୁଠି କ୍ଲବ ଘରେ କ୍ରିକେଟ ସାମଗ୍ରୀ ତଥା ଟିଭି ଦାନ ଦେଇଦେବା କହି ଆମଠୁ ଭୋଟ ନେଇ ଆମକୁ କିଣି ନେଉଛନ୍ତି ଏହି ତଥାକଥିତ ଭ୍ରଷ୍ଟ ଓ ଦୁର୍ନୀତିଗ୍ରସ୍ତ ରାଜନେତାମାନେ। ଆମେ ବି ସାମାନ୍ୟ ସ୍ୱାର୍ଥ ପାଇଁ ବିକ୍ରି ହେଇଯାଉଛେ ଏହି ବୃହତ୍ ଗଣତାନ୍ତ୍ରିକ ମତଦାନ ପ୍ରକ୍ରିୟାରେ। ଏଥିସହ ଦେଶୀ ବିଦେଶୀ ମଦ ତଥା ଦେଶୀ ଓ ବ୍ରଏଲର କୁକୁଡ଼ା ମାଉଁସ ଆମକୁ ବାଇଆ କରିଦେଇଛି ବିକ୍ରି ହେବା ପାଇଁ ଭୋଟ ବେଳରେ। ଦେଶକୁ ତଥା ଜାତିକୁ ପରିବର୍ତ୍ତନ ତଥା ଠିକ୍ ବାଟରେ ନେବା ପାଇଁ ଯେଉଁ ବିଶାଳ ଯୁବଶକ୍ତି ଆମ ପାଖରେ ଅଛି, ତାକୁ ମଧ୍ୟ ଏହି ନେତାମାନେ ନିଜ କ୍ଷମତା ପାଇଁ କିଣି ନେଉଛନ୍ତି ଅତି ସହଜରେ। ଆମେ ନିଜକୁ ପୃଥିବୀର ବୃହତ୍ତମ ଗଣତାନ୍ତ୍ରିକ ରାଷ୍ଟ୍ରର ସଭ୍ୟ ନାଗରିକ ରୂପେ ପରିଚୟ ଦେଉଛେ ହେଲେ ଭୋଟ ପୂର୍ବଦିନ ମୁଣ୍ଡପିଛା ୫୦୦-୧୦୦୦ ଲେଖାଏଁ ଆଣି ନିଜ ପରିବାର ସହିତ ବିକ୍ରି ହେଇଯାଉଛେ। ଏ ଦେଶ, ଏ ଜାତି ଓ ଆମ ଗଣତନ୍ତ୍ରକୁ ବଞ୍ଚାଇବାକୁ ହେବ। ବୁଦ୍ଧିଜୀବୀ, ସାହିତ୍ୟିକ, କବି, ସମାଜସେବୀ, ଯୁବ ଓ ମହିଳାଗୋଷ୍ଠୀମାନଙ୍କୁ ନିଜ ବିବେକ ଖଟାଇ କର୍ତ୍ତବ୍ୟ ସାଧନ କରିବାକୁ ହେବ। ନଚେତ୍ ଆମ ଗରିବୀ ବଢିବ, ନକ୍ସଲ ବଢିବେ, ଅରାଜକତା ସୃଷ୍ଟି ହେବ, ସୀମା ସଂକୁଚିତ ହେବ। ଆଜିର ଆହ୍ୱାନରେ ଗୋଟିଏ ଆବେଦନ-ଯୁବଗୋଷ୍ଠୀ ଭୋଟର ତାଲିକାରେ ପାଦ ଦେଉ ଦେଉ ତାଙ୍କୁ ପ୍ରଲୋଭିତ କରି ଭୋଟ ଦାନ ପାଇଁ ବିକ୍ରି ହେବାକୁ ଦିଅନ୍ତ ନାହିଁ। ତାଙ୍କୁ ଭଲ କ’ଣ ଶିଖାନ୍ତୁ, ସେମାନେ ବିକ୍ରି ହେଲେ ଦେଶର ଭବିଷ୍ୟତ ଅନ୍ଧାର ରହିଯିବ। ଆଶା ଦେଶର ସର୍ବବୃହତ୍ ଯୁଗଗୋଷ୍ଠୀ ଭୋଟ ଦାନ ବେଳେ ବିକ୍ରି ହେବେ ନାହିଁ। ଅଧ୍ୟକ୍ଷ, ରାଜ୍ୟ ନାଗରିକ ସମାଜ ଫୋନ-୯୪୩୭୨୮୫୦୯୨

Share :