ଭାଷା ବାଇମୁଣ୍ଡିମାନଙ୍କ ବିଷୟରେ

News Story - Posted on 2016-06-19

ପରଂବ୍ରହ୍ମ ତ୍ରିପାଠୀ

 

କାଲି ସନ୍ଧ୍ୟାରେ ଅନୁପ ଘରକୁ ଯାଇଥିଲି। ୧୯୯୮ରେ ଯୁକ୍ତ ଦୁଇ ବିଜ୍ଞାନ ଶେଷ କଲା ପରେ ଅନୁପ ଦିଲ୍ଲୀ ଆସିଯାଇଥିଲା ଡାକ୍ତରୀ ପଢିବାକୁ। ତା’ପରଠାରୁ ସେ ଏଇଠି।  ବାହା ହେଇଛି ଜଣେ କନ୍ନଡ ଝିଅକୁ ଆଉ ଏବେ ସେମାନଙ୍କ ପୁଅକୁ ପାଞ୍ଚ ବର୍ଷ।

 

ଅନୁପ ଘରେ ମୁଁ ଗୋଟେ ଭଲ କଥା ଦେଖିଲି। ତା ପୁଅ ଯେମିତି ଜାଣିଲା ମୁଁ ଓଡିଆ, କେତେକ ନିହାତି ଆବଶ୍ୟକ ଶବ୍ଦ ଯଥା ଫୋନ, ସ୍କୁଲ ଇତ୍ୟାଦି ଛଡା ମୋ ସହ ଯାହା କଥା ହେଲା ଓଡିଆରେ ହିଁ କଥା ହେଲା।

 

ମୁଁ ଖୁସିରେ ଅନୁପକୁ କହିଲି, ବାଃ ତୋ ପୁଅ ତ ବଢିଆ ଓଡିଆ କହୁଛି। ଅନୁପ ମୁହଁଟାକୁ କେମିତି ଗୋଟେ କରି କହିଲା, ହଁ ରେ ନିଜ ମାତୃଭାଷା କହିବାଟା ବି ସବାସୀର କଥା।

 

ମତେ ଲାଗେନି ଓଡିଆ ନ କହିଥିଲେ ଅନୁପ ପୁଅର ସେମିତି କିଛି ଗୋଟେ କ୍ଷତି ହେଇଯାଇଥାନ୍ତା। ମାତ୍ର ଅନୁପ ଆଉ ତା ପତ୍ନୀକୁ ଶତ ଧନ୍ୟବାଦ ଯେ ସେମାନେ ତାଙ୍କ ପିଲାକୁ ନିଜ ଐତିହ୍ୟ ସହ ଯୋଡିବାକୁ ଚେଷ୍ଟା କରିଛନ୍ତି।

 

ସେତେବେଳେ ହିଁ ମୋ ମୁଣ୍ଡରେ ଏ କଥାଟି ଢୁକିଲା। ସତରେ ଏ ଭାଷାର ବାଇମୁଣ୍ଡି କିଏ? ଭାଷାର ସ୍ଲୋଗାନ ଦେଉଥିବା ଓ ପତାକା ଧରୁଥିବା ସେହିମାନେ ଯେଉଁମାନଙ୍କ ଡ୍ରଇଂରୁମରେ ବି ଓଡିଆର ପ୍ରବେଶ ସୀମିତ ନା ସଂଖ୍ୟାରେ ନଗଣ୍ୟ ହେଲେ ବି ଏଇ ଅନୁପମାନେ ଯେଉଁମାନେ ପ୍ରବାସରେ ସକଳ ପ୍ରତିକୂଳ ପରିସ୍ଥିତି ଭିତରେ ବି ନିଜ ଭାଷାକୁ ବଞ୍ଚେଇ ରଖିଛନ୍ତି?

 

ଦିଲ୍ଲୀରେ ଇଣ୍ଟେଲେକ୍ଟସ ବୋଲି ସଂଗଠନଟିଏ ଅଛି। ପାଞ୍ଚ ବର୍ଷ ତଳୁ ଏମାନେ ଆରମ୍ଭ କରିଛନ୍ତି ଛୋଟ କିନ୍ତୁ ମହନୀୟ ପ୍ରୟାସଟିଏ। ପ୍ରତି ରବିବାର ଏହି ସଂଗଠନର ସଦସ୍ୟମାନେ ଦିଲ୍ଲୀରେ ଥିବା ପ୍ରବାସୀ ଓଡିଆ ପିଲାମାନଙ୍କୁ ଓଡିଆ ଶିଖାନ୍ତି। ଦିଲ୍ଲୀର ପାଞ୍ଚୋଟି ଜାଗାରେ ସଂଗଠନ ପକ୍ଷରୁ ଚାଲିଛି ଏହି ରବିବାରିଆ ଓଡିଆ ବିଦ୍ୟାଳୟ। ଆଉ ସେଠି ଓଡିଆ ପଢୁଛନ୍ତି ୩୦୦ରୁ ଅଧିକ ପିଲା। ଅନୁଷ୍ଠାନର ଅଧ୍ୟକ୍ଷ ଦେବେନ୍ଦ୍ର ରାଉତ ଜଣେ ଯୁବ ଶିକ୍ଷାବିତ ତଥା ଭାଷା ଅନୁରାଗୀ। ହେଲେ ସେ ଭାଷା ଅନୁରାଗକୁ ନିଜ ଭିତରେ ସୀମିତ ରଖି ନାହାନ୍ତି। ଆଉ ଏହାର ଫଳଶ୍ରୁତି ହେଉଛି ରାଜଧାନୀରେ ଓଡିଆ ଶିକ୍ଷା।

 

ବେଶୀ ପୁରୁଣା କଥା କହୁନି, ପାଞ୍ଚ ସାତ ବର୍ଷ ତଳେ ଇଣ୍ଟରନେଟରେ ଓଡିଆ ଭାଷାରେ ଖୋଜିଲେ କିଛି ବି ମିଳୁ ନଥିଲା। ଆଜି ଖୋଜନ୍ତୁ, କେବଳ ଓଡିଆ ଉଇକିପେଡିଆ ବା ମୁକ୍ତ ଜ୍ଞାନକୋଷରେ ରହିଛି ବିଭିନ୍ନ ବିଷୟରେ ୧୦ ହଜାରରୁ ଅଧିକ ଲେଖା। ଆଉ ଏହା ଗୋଟିଏ ରାତିରେ ସମ୍ଭବ ହେଇନି। ଏହା ହେଉଛି ଶୁଭାଶିଷ ପାଣିଗ୍ରାହୀ ଓ ତାଙ୍କ ଉତ୍ସର୍ଗୀକୃତ ସାଥୀମାନଙ୍କ ବର୍ଷବର୍ଷର କଠିନ ପରିଶ୍ରମର ଫଳଶ୍ରୁତି। ଇଣ୍ଟରନେଟ ବ୍ୟବହାର ହିଁ ହେଉଛି ଆଜିର ବାସ୍ତବିକତା। ଆଉ ସେହି ବାସ୍ତବିକତା ଭିତରେ ଓଡିଆକୁ ପ୍ରାସଙ୍ଗିକ କରି ରଖିବା ପାଇଁ ଶୁଭାଶିଷ ଓ ତାଙ୍କ ସାଥୀମାନଙ୍କ ପ୍ରୟାସ ନିଶ୍ଚିତ ଭାବେ ସାଧୁବାଦର ପାତ୍ର।

 

ଯୁକ୍ତରାଷ୍ଟ୍ର ଆମେରିକାରେ କୁକୁ ଦାଶଙ୍କର ଓଡିଆ ଶିଖେଇବା କାର୍ଯ୍ୟକ୍ରମ ହେଉ ବା ମୁମ୍ବାଇସ୍ଥିତ କାଦମ୍ବିନୀ ମିଡିଆ ଦ୍ଵାରା ପ୍ରସ୍ତୁତ ଓଡିଆ ଶିଶୁ ଗୀତ ଭିଡିଓ- ଏ ସମସ୍ତେ ଏ ଭାଷା ଓ ସଂସ୍କୃତି ସୁରକ୍ଷା ଦିଗରେ ବାଇମୁଣ୍ଡିର ପ୍ରୟାସ। ଭାଷା ଲିଟ ଫେଷ୍ଟରେ ବଞ୍ଚେନି, ବଞ୍ଚେ ବ୍ୟବହାରିକତାରେ, ବଞ୍ଚେ ପ୍ରତିବଦ୍ଧତାରେ। ୫୦ ବର୍ଷ ପରେ ଯେତେବେଳେ ଏ ଭାଷାର ଇତିହାସ ଆଉ ଥରେ ଲେଖା ହେବ, ଏ ଲେଖକର ଆଶା ଓ ବିଶ୍ଵାସ ଯେ ଏହି ବାଇମୁଣ୍ଡିମାନଙ୍କୁ ନିଜ ଭାଗର ଶ୍ରେୟ ନିଶ୍ଚିତ ମିଳିବ।


ପ୍ରତିକ୍ରିୟା

ଏନ ଏ ଶାହଃ ଅନସାରୀ - Email: ansari4media@gmail.com - Posted on 2016-06-19 15:46:24

ଭଲ ଲେଖାଟିଏ ହୋଇଛି I ଇଣ୍ଟେଲେକ୍ଟସ କାମ ପାଖରୁ ଦେଖିଛି I ଏ ବର୍ଷ ଶୁଭାଶିଷ ନାଁ ମୁଁ ପଦ୍ମ ସମ୍ମାନ ପାଇଁ ମନୋନୟନ କରିଥିଲି I ଏଇ ବାଇମୁଣ୍ଡି ମାନେ ହିଁ ଭାଷାକୁ ରଖିବେ I ପୁଅ, ନାତି ମାନଂକୁ ଇଂରାଜୀ ବିଦ୍ୟାଳୟରେ ପଢେଇ ମଂଚରେ ଭାଷଣ ଦେଉଥିବା ଲୋକ ନୁହନ୍ତି ......

Sangram Keshari Senapati - Email: dr.gapu@rediffmail.com - Posted on 2016-06-20 07:34:17

ଓଡ଼ିଆ ହୋଇ ଓଡ଼ିଆ କ‌ହିଲେ କିଛି ବି କ୍ଷତି ନାହିଁ । ମୁଁ ଯେତେବେଳେ ଇଞ୍ଜିନିୟରିଂ କରିବାକୁ ଯାଇଥିଲି କେବଳ ଓଡ଼ିଆ ଭାଷା ବ୍ୟତୀତ ଆଉ କଛି ଭାଷା ଜାଣି ନଥିଲି କି ବୁଝିପାରୁନଥିଲି । ସେଥିପାଇଁ ମୋତେ ନିଜକୁ ବ‌ହୁତ ଖରାପ ଲାଗୁଥିଲା ହେଲେ ଆଜି ୪ ବର୍ଷ ପରେ ମୁଁ କେବଳ ଓଡ଼ିଆ ଭାଷାକୁ ଜାଣିଥିଲି ବୋଲି ନିଜକୁ ନିଜେ ଗର୍ବ କରୁଛି । ଓଡ଼ିଆ ଭାଷାର ପ୍ରଚାର ତ‌ଥା ଉଇକିପିଡ଼ିଆରେ ଶୁଭ ଭାଇଙ୍କର ଅବଦାନ କିଛି କମ ନୁହେଁ । ମୁଁ ଏକା ଓଡ଼ିଆ କ‌ହିବିନି, ମୋର ସାଥୀମାନଙ୍କୁ ମଧ୍ୟ ଓଡ଼ିଆ କ‌ହିବାକୁ ପ୍ରେରଣା ଦେବି ।

Pankajmala Sarangi - Email: pankajmala1@gmail.com - Posted on 2016-06-20 14:38:25

ପରଂବ୍ରହ୍ମ ଲେଖାଟି ବଢ଼ିଆ ହୋଇଛି । ଓଡ଼ିଆ ଭାଷାକୁ ବଞ୍ଚାଇବାକୁ ହେଲେ ଆମ ସମସ୍ତଙ୍କୁ ଏହାର ଦାୟିତ୍ୱ ନେବାକୁ ହେବ ଓ ଆମ ପର ପିଢ଼ିକୁ ଓଡ଼ିଆ ଲେଖିବା ଓ ପଢ଼ାଇବା ଶିଖେଇବାକୁ ହେବ । ଯେହେତୁ ପରପିଢ଼ି କମ୍ପୁଟର ଓ ମୋବାଇଲ ର ଅଧିକ ସକ୍ରିୟ ସେଥିପାଇଁ ଆମକୁ ଓଡ଼ିଆ ଓ ଓଡ଼ିଶାର ସବୁ ବିଷୟବସ୍ତୁ ଇନଟରନେଟରେ ଉପଲବଧ୍ କରାଇବା ଆବଶ୍ୟକ । ସେଥିପାଇଁ ଆମକୁ ସୁଭାସିସ ଓ ଓଡ଼ିଆ ଉଇକିପିଡ଼ିଆର ସାହାଯ୍ୟ ନିହାତି ଆବଶ୍ୟକ ।

ନରେନ୍ଦ୍ର କୁମାର ଆଚାର୍ଯ୍ୟ - Email: navachintan@gmail.com - Posted on 2016-08-25 14:58:04

ଗୋଟିଏ ଭାଷା ବଞ୍ଚି ରହେ ବିଭିନ୍ନ କ୍ଷେତ୍ରରେ ଏହାର ବ୍ୟବହାର, ଏହା ପ୍ରତି ଆମର ଅନୁରକ୍ତି ଓ ଉତ୍ତର ପିଢିକୁ ଏହା ସହ ଅଭ୍ୟସ୍ତ କରାଇବା ଦ୍ଵାରା। ଯେଉଁମାନେ ଆତ୍ମପ୍ରଚାରରୁ ଦୂରରେ ରହି ଏହି ପବିତ୍ର କର୍ତ୍ତବ୍ୟଟିକୁ ନିର୍ବାହ କରୁଛନ୍ତି, ସେମାନେ ହିଁ ଭାଷାର ପ୍ରକୃତ ରକ୍ଷକ। ସେମାନେ ହିଁ ସମ୍ମାନର ପାତ୍ର।

ନିଜର ପ୍ରତିକ୍ରିୟା ଦିଅନ୍ତୁ-









© 2015. Samanya Kathan All Rights Reserved | Editor : Debendra Prusty     

To Top